LAOAG CITY – Ginutigot ni Vice Mayor Rey Carlos Farinas dagiti residente ditoy siudad ti Laoag a gumatang iti bukod a fire extinguisher.
Daytoy ket kalpasan iti napasamak nga uram iti Brgy. Nalbo ditoy siudad iti kallabes a nakapukawan ti innem a pamilya ti pagtaengan da.
Segun kenkuana, naobserbaran na a dagiti babbalay iti lugar ket agdidikket isut gapuna a napintas no adda bukod a fire extinguisher dagiti residente tapno alisto da laeng a masebseban iti apoy, laketdi bassit pay daytoy wenno saan pay a nagwaras.
Inbatad ni Fariñas a babaen iti panaggatang iti fire extinguisher ket saan laeng a makasalbar iti balay wenno sanikua no diket kangrunaan na iti biag.
Kunana a narigat no danom laeng iti usaren a pangsebseb iti apoy aglalo no naaramid iti light materials iti maysa a pagtaengan.
