LAOAG CITY – Naisalakan ti 31 nga indibidual ti Nigerian army kalpasan ti Easter church attack iti amianan a laud a paset ti Nigeria.
Segun iti local church official, umabot iti pito ti natay gapu kadagiti armado a lallaki kagiddan iti pannakaobserbar ti Easter Sunday iti maysa a simbaan iti Ariko, Kaduna state.
Inbatad dagiti otoridad, nagbalin a nabara ti panagrinnupak iti nagbaetan dagiti suldado ken dagiti armado a lallaki no sadinno a naglibas ken timmalaw dagiti suspek isut gapuna a nabati dagiti hostages ken dagiti bangkay dagiti biktima iti lugar.
Mainaig iti daytoy, dagiti panangatake ken panag-kidnap para iti ransom ket masansan a mapaspasamak iti amianan ti Nigeria kabayatan a makapaspasar ti pagilian kadagiti pangta iti seguridad manipud kadagiti jihadist group ken armado a gang nga ad-adda nga am-ammo iti awag a bandits.
Gapu iti daytoy, naka-deploy dagiti suldado tapno arestaren dagiti rebelde ken papigsaen ti seguridad.
Inallukoy dagiti suldado dagiti residente a mangipaay kadagiti impormasion a mabalin a mangsuporta kadagiti operasion kontra kadagiti grupo a mangiwaywayat ti panangatake.
