LAOAG CITY – Umabot iti 32 a tattao ti natay idinto a 16 a sabsabali dagiti nasugatan kalpasan a natnag ti nagluganan da a bus iti rangkis iti south-western Pakistan.
Ti nasao a bus ket agdaldalyasat manipod Quetta agturong koma iti Peshawar, ngem idi nadanun na ti kabanbantayan a paset ti Dana Sar, ti border iti nagbaetan dagiti probinsya ti Balochistan ken Khyber Pakhtunkhwa ket ditoyen a napasamak ti insidente.
Naamoan a ti bus ket nagluganan ti 48 a tattao, pakairamanan ditoy ti sumagmamano a babbai ken ubbing.
Agpapan ita ket maim-imbestigar paylaeng no ania iti makaigapu a napasamak ti insidente, ngem possible a napukawan ti kontrol iti manibela ti driver ti bus.
