LAOAG CITY – Umabot iti 32 a tattao ti natay iti panagreggaay ti Kalando mining site iti probinsya ti Lualaba iti southeastern Congo.
Basar iti artisanal mining agency, malaksid kadagiti natay ket adda pay ti 20 a sabsabali a naitaray iti ospital ken dagitoy ket agpapada nga adda iti kritikal a kondisyon.
Ti Artisanal mining ket addaan ti empleado nga agarop 2 a milyon idiay Congo ken supsuportaran na ti nasurok a 10 a milyon nga indibidual.
Inpakaammo ti Congo’s Artisanal and Small-Scale Mining Support and Guidance Service a panagreggaay ti nasao a pagminasan ket gapu iti panagpanic dagiti naruay a tattao gapu iti panagpaputok ti paltog dagiti soldado iti nadakamat a lugar.
Gapu iti daytoy, nagpanawagan ti Initiative for the Protection of Human Rights ti independent investigation iti inaramid dagiti soldado, aglalo ket adda pay ti report nga adda napasamak a maipagarop nga engkwentro iti nagbaetan da kaadagiti minero.
