LAOAG CITY – Inpetteng ti defense counsel ni dati a Presidente Rodrigo Duterte a ni Atty. Nicholas Kaufmann nga impossible nga usaren a pagibasaran dagiti nagbalin a panagbitla na tapno paneknekan ti criminal intent, kagiddan ti panangdillaw na ti maipagarop a saan a kompleto a panangidasar ti prosekusyon iti pundo a konteksto dagiti rakurak ti dati a chief executive.
Iti panagtultuloy ti maikatlo nga aldaw ti confirmation of charges hearing iti kaso a Crimes Against Humanity, dinakamat ti abogado ti maikadwa a panagbitla ni International Criminal Court Deputy Prosecutor Mame Mandiaye Niang iti opening statement.
Ti nasao a panagbitla ni Niang ket maipanggep ti maipagarop a panangadmitir ni Duterte ti responsibilidad ken karina a protehiran dagiti rogue officers manipod iti prosekusyon.
Basar iti depensa, inpresentar laeng ti Deputy Prosecutor ti sumagmamano a paset ti panagbitla ti dati a presidente.
Nupay kasta, inpetteng ti kampo ni Duterte nga adda ti napateg a paset a nairanta nga inikkat ti prosekusyon.
Inpakita pay ti abogado ti nayun a rakurak manipod iti kapada a panagbitla no sadinno a nalawag nga ibilbilin ti dati a presidente kadagiti otoridad nga unaen ti naurnus a panagarestar.
Maipalagip nga inlawlawag ti depensa a nupay mabigbig ti dati a presidente iti natured a panagsarsarita na, ti pakabuklan ti mensahe ti nasao a direktiba ket nalawag a panggutigot ti lawful self-defence.
Innayon ti abogado nga ipakpakita iti sibubukel a panagbitla a mapalubusan laeng ti panagusar ti pwersa no adda ti violent resistance a mangikabil iti risgo dagiti biag dagiti pulis ken pammaneknek daytoy nga awan ti naibilin a criminal intent ti dati nga administrasyon.
