LAOAG CITY – Inpakaammo ni Fire Superintendent Roxanne Parado, ti Provincial Fire Marshal ti Bureau of Fire Protection ditoy Ilocos Norte nga umabot iti 37 a fire incidents ti nairekord iti umuna a dua a bulan ita a tawen 2024 ditoy probinsia.
Segun kenkuana, dagiti kangrunaan a napasamak nga uram ket dagiti residential, forest ken grass fire.
Gapu iti daytoy, naminsan manen a nagpalagip ni Fire Senior Inspector Parado iti publiko kagiddan ti pannakaobserbar ti Fire Prevention Month ita a bulan ti Marso.
Kunana nga adda dagiti sumagmamano nga aktibidad ken programa nga iyuswatda ita a bulan kas ti simple a program kick off babaen ti fire truck visibility tapno maipakaammo kadagiti umili dagiti nasken nga aramidenda no adda ti mapasamak nga uram.
Inbatadna a maiyuswat met ti Fire Provincial Olympics a pakipagpasetan dagiti bumbero parakairamanan dagiti kameng iti Community Fire Auxiliary Group ken Industrial Brigade.
Mainaig iti daytoy, inlawlawagna nga iti maikatlo a lawas ti Marso ket maisayangkat ti Capacity Building no sadino adda ti maiyuswat a basic mountain search and rescue ken basic forest fire fighting idinto iti maudi a lawas ket maangay ti Oplan Summer Vacation.
Naammoan nga umabot iti 300 a personnel ti agpapaay ti Bureau of Fire Protection ditoy Ilocos Norte ken amin a fire station ditoy probinsia ket addaan ti bukud a fire truck.
Kabayatanna, kuna ni Parado a naiget pay ti panaginspeksionda ti fire extinguisher kadagiti pasdek-negosio tapno makaalada ti fire safety certification kadakuada para iti pannakaipabaro ti business license dagiti maseknan a negosiante.
