LAOAG CITY – Kaso a panagsalungasing iti RA 9165 wenno Comprehensive Dangerous Drugs Act of 2002 ti maipila kontra iti frontliner a natiliw iti naiyuswat nga anti-illegal drug buybust operation iti Brgy. 1-Valdez iti siudad ti Batac.
Nabigbig ti frontliner a ni Mark Evon Baguinon y Languisan, agtawen ti 28, baro, registered nurse ken residente iti Brgy. 8-Acosta iti siudad ti Batac, empleyado ti Department of Health ken nakadesignar iti City Health Office iti nasao a siudad.
Segun ken ni Pol. Chief MSgt. Harold Nicolas iti Provincial Drug Enforcement Unit (PDEU) Ilocos Norte, naarestar ni Baguinon kalpasan a naglako ti lima nga heat-sealed transparent sachet a naglaon ti maipagarup a shabu iti pulis a nagpammarang a posuer-buyer.
Malaksid iti inlako ni Baguinon ket nakumpiskar pay kenkuana ti uppat nga heat-sealed plastic sachet a naglaon ti maipagarup a shabu, 1,000 a pisos a marked money, 4,000 a pisos a boodle money, 1,000 a genuine bill, 800 a pisos a personal a kwarta ti supek, maysa nga iphone 10 a cellphone ken mio motorcycle.
Naamoan nga agdagsen ti 3.9 a gramo dagiti nakumpiskar a maipagarup a shabu ken agdagup iti 39 a ribo a pisos.
Kabayatanna, ni Baguinon ket adda iti drug list ti INPPO ken high value individual (HVI) iti regional watchlist ti PRO1.
