LAOAG CITY – Kumpiansa ni Nanette Castillo, ina ti maysa kadagiti maipagarup a biktima ti extrajudicial killings (EJK) a mapagsungbat ni dati a Presidente Rodrigo Roa Duterte iti sangsangoenna a kaso a crimes against humanity.
Inbatad ni Castillo a dakkel a namnama ti pamiliada a kumpirmaren ti International Criminal Court Pre-Trial Chamber ti kaso ni Duterte tapno naan-anay daytoy nga agtungpal iti maysa a full trial ken mapagsungbat ti dati a Presidente.
Maipalagip a pinapatay ti anak daytoy a ni Aldrin dagiti saan pay a nabigbig a suspek idi Oktubre 3, 2017 idiay Manila.
Naiget a bwineltaan ni Castillo dagiti nagbalin a rakurak ti defense lawyer ni Duterte a ni Atty. Nicholas Kaufman.
Segun iti ina ti biktima, agpapada nga inuulbod dagiti isawsawang ti abugado.
Kunana nga arig nagbalin a Davao Death Squad ti gangannaet nga abugado a bulsek iti kinapudno gapu iti panangikagumaanna a paruaren a maysa a bannuar ni Duterte.
Ti nasao nga insidente ket nairekord idi kangitingitan ti nadara a war on drugs iti napalabas nga administrasion.
Kagiddan iti agtultuloy nga imbestigasion iti International Criminal Court, nagkiddaw ti kararag ti pamilia Castillo manipud iti publiko para iti pannakagun-od ti hustisia.
