LAOAG CITY – Nangiparuk-at ti memorandum ni Mayor James Bryan Alcid para iti pannakaiyimplementar ti 4 nga aldaw a panagtrabaho dagiti empleyado ti lokal a gobierno ditoy ciudad ti Laoag iti kada lawas.
Daytoy ket kas panangsurot iti pammilin ni Presidente Ferdinand Marcos Jr. a mangipatungpal ti energy conservation measures iti amin nga opisina ti gobierno gapu iti ngumatngato a presyo ti langis mainaig iti tension iti Middle East.
Nakailanad iti memorandum nga agtrabaho dagiti empleado manipod alas-7:30am-6:30pm manipod Lunes agingga iti huwebes.
Nupay kasta, inlawlawag ti mayor a dagiti opisina a mangipapaay kadagiti kangrunaan a serbisyo para iti salun-at, emergency response ken public safety kas iti Laoag City General Hospital, City Social Welfare and Development Office, City Disaster Risk Reduction and Management Office ken dadduma pay ket agtalinaed a lima nga aldaw iti kada lawas ti panagtrabaho da.
Iti baet daytoy, kiniddaw ti mayor a saan koma a rumbeng a maapektaran ti trabaho iti kada pangopisinaan.
Malaksid iti daytoy, naibilin pay a masapol nga iti oras ti trabaho ket agtalinaed ti 24C ti standard thermostat dagiti aircondition ken mausar laeng mangrugi iti oras ti alas-8:30 ti bigat agingga iti alas-5:30 ti malem, ken rumbeng a maiddep dagiti silaw ken dadduma nga electrical equipment a saan a maus-usar.
