LAOAG CITY – Inrakurak ti Department of Migrant Workers (DMW) a manarimaanen ti pannakikoordinar ti Pilipinas kadagiti opisyal ti Brunei tapno masalbar ti biag dagiti Pilipino a nasentensyaan ti dusa a patay.
Segun ken ni Department of Migrant Workers acting secretary Hans Cacdac, kiniddaw ti Pilipinas iti Brunei a maipaayan ti pardon wenno maipababa iti life imprisonment ti pannusa kadagiti Pilipino nga adda iti death row.
Maipalagip nga iti napalabas a lawas ket napan binisita ni Cacdac ti dua nga Overseas Filipino Workers a nakabalud idiay Brunei.
Karaman ti opisyal iti delegasyon ni Presidente Ferdinand Marcos Jr., iti dua nga aldaw nga state visit idiay Brunei Darussalam idi Mayo 28 agingga iti 29, 2024.
Naamoan a karaman kadagiti nakabalud idiay Brunei sipud pay idi 2016 ket ni Cyrile Tagapan, a sinentensyaan ti korte gapu iti panangpatayna ti Bruneian citizen, ken addaan pay ti kaso nga arson ken theft.
Kuna ni Cacdac nga uppat manipod kadagiti 10 a Pilipino a nakabalud idiay Brunei ket adda iti death row.
Kabayatanna, kiniddaw ti Pilipinas iti Brunei a waya-wayaan da a nasapsapa ti dua a nakabalud a Pilipino iti nadakamat a pagilian nga agpada nga agtawenen ti 70.
Inpakaammo ni Cacdac nga umabot iti 70 a Pilipino ti ada iti death row iti nagduduma a pagilian a kaadoan ket adda iti Saudi Arabia ken Malaysia.
