LAOAG CITY – Naarestar ti uppat nga indibidual a pakairamanan ti maysa a menor de edad iti naisayangkat nga anti-illegal gambling operation iti maysa a minatayan iti Barangay 17 iti ili ti Sarrat.
Daytoy ti inbatad ni Police Capt. Ashley Cacayorin, ti chief of police iti nasao nga ili.
Segun ken ni Cacayorin, kinemmeg da a dagus dagiti suspek kalpasan a naaktwan da dagitoy nga agay-ayam ti “Pepito”.
Nakumpiskar dagiti otoridad iti lugar ti P15, 543 a pisos ngem ti P12,500 ket naala da iti bulsa ti nagbangka isut gapuna a ti laeng sobrana ti naideklarar kas pusta da.
Nupay kasta, inpakaammo ni Cacayorin nga iti panangipila da ti kaso kontra kadagiti suspek ket inbasura ti piskalya gapu ta saan da a nasurot ti Jurisprudence iti Korte Suprema isut gapuna a nawaya-wayaan metlaeng dagiti maseknan.
Inlawlawag na a kompleto dagiti inpresentar da a dokumento ngem ti saan da a nasurot ket ti panangala da koma ti video gapu ta kasapulan koma a nakavideo dan sipud rinugyan da ti nagturong iti lugar a nagsusugalan dagiti suspek.
Segun ken ni Cacayorin, saan da nga inopen a dagus ti video da gapu ta possible a mapakadaan dagiti suspek ti isasangpet dagiti otoridad aglalo ket dakkel ti posibilidad na nga adda latta ti agbanbantay iti ruwar a kakadwa da.
Mainaig iti daytoy, inpasigurado ni Cacayorin nga iti sumaruno nga adda ti operasyonan da mainaig iti illegal a panagsusugal ket siguradwen da a masurot amin a proseso tapno saanen a maulit ti napasamak.
Kabayatanna, nagpanawagan ni Cacayorin kadagiti umili nga ado dagiti wagas tapno matulungan dagiti nagminatay saan ketdi a ti panagsusugal.
