LAOAG CITY – Nasugatan ti uppat nga indibidual kalpasan ti napasamak a panagbettak iti Tayuman Street kanto ti Dagupan Street iti Manila.
Basar iti Manila Police District’s Explosive Ordnance Division (MPD-EOD), maysa a dismantled nga air-conditioning compressor ti nabirukan iti lugar a mapapati a nangitunda ti napasamak a panagbettak.
Dagus a naitaray iti ospital dagiti biktima babaen kadagiti emergency responders manipod iti Bureau of Fire Protection (BFP), Philippine National Police (PNP), ken lokal a rescue units.
Dua kadagiti biktima ket naikabil iti Tondo General Hospital, idinto a ti maysa pay ket naipaagas iti Jose Reyes Memorial Medical Center.
