LAOAG CITY – Natalged a nakasangpet ti uppat nga Overseas Filipino Workers a residente ditoy siudad ti Laoag manipud iti Middle East.
Segun ken ni Ms. Shey Pia Abaya, mangidadaulo ti Public Employment Service Office, dagiti nasao nga Overseas Filipino Workers a nakaawid ditoy pagilian ket aggapu iti United Arab Emirates, Kuwait, Kingdom of Saudi Arabia ken Israel.
Inbatadna a nakikoordinarda iti Barangay Employment Service Office kadagiti maseknan a barangay dagiti Overseas Filipino Workers para iti panagawid dagitoy.
Inlawlawagna nga adda ti indiaya ti Overseas Workers Welfare Administration a psychological ken medical assistance kadagiti Overseas Filipino Workers.
Innayonna a plano ti opisinada a mangilatang ti pundo tapno adda ti mausar a tulong pinansial no adda dagiti Overseas Filipino Workers a residente ditoy siudad ti Laoag nga agawid ditoy pagilian gapu iti gubat wenno aniaman a didigra.
