LAOAG CITY – Natay ti 42 nga indibidual kalpasan a natnag ti naglugananda a bus iti derraas idiay South Africa.
Binigbig dagiti otoridad dagiti biktima a Zimbabwean ken Malawian nationals.
Basar iti imbestigasion dagiti transport officials, napasamak ti insidente kabayatan a dumaldalyasat ti bus iti paset ti kabanbantayan iti N1 highway iti South Africa’s Limpopo province.
Indanon ni South African President Cyril Ramaphosa ti pannakipagladingitna gapu iti kinaadu ti bilang dagiti pimmusay a pakairamanan ti pito nga ubbing.
Inbatadna a saan laeng daytoy a trahedya ti pagilianda no diket karaman pay dagiti sister states-da a Zimbabwe ken Malawi.
Mainaig iti daytoy, basar kadagiti reports, ti bus ket dumaldalyasat manipud iti siudad ti Gqeberha iti Eastern Cape ken saan pay a masinunuo no mano a tattao ti nakalugan iti bus idi napasamak ti desgrasia ken mano ti kapasidad daytoy.
Naammoan a malaksid kadagiti pito nga ubbing a natay ket adda ti 18 a babbai ken 17 a lallaki idinto nga 49 ti nasugatan.
Kabayatanna, manamnama a bumisita iti lugar dagiti opisial ti gobierno pakairamanan ni Transport Minister Barbara Creecy.
Iti agdama, manarimaan pay laeng ti imbestigasion no ania ti namunganayan ti insidente.
