LAOAG CITY – Naragsak nga inpadamag ni P/Maj. Jhonvale Maramag, Hepe ti Pasuquin Municipal Police Station a negatibo amin ti nagbalin a resulta dagiti 43 a drug surrenderees a dimmalan iti surprise drug test.
Segun kenkuana, daytoy ket babaen iti pannakibinnulig ti Philippine National Police iti Municipal Health Office iti ili ti Pasuquin para iti balligi a pannakaisayangkat ti nasao nga aktibidad.
Inbatadna a napili dagiti maseknan a drug surrenderees nga umuna a dumalan iti drug test idinto a sumarsaruno dagiti dadduma pay.
Inlawlawagna nga awan met ti nagkedked kadagiti drug surrenderees no sadinno a sitatallugod dagitoy a dimmalan iti surprise drug test.
Kunana nga adda ti nasurok 300 a drug surrenderees iti ili ti Pasuquin ngem manarimaan pay laeng ti panangiberipikarda iti nasao a datos.
Kabayatanna, inpakaammo ni P/Maj. Maramag a naiget ti panangmonitorda kadagiti drug surrenderees no sadinno dumalanda iti seminar tapno maipasigurado a naan-anayen ti panagbalbaliw dagitoy.
