LAOAG CITY – Inlawlawag ni Sangguniang Panlalawigan Member ken Chairman ti Committee on Agriculture Domingo Ambrocio Jr. a saan a mairaman a maipaayan ti ASF assistance dagiti baboy a 45 days old agpababa.
Segun kenkuana, daytoy ti maysa kadagiti kangrunaan a napagnumoanda kabayatan ti Public Hearing iti kallabes pakaseknan kadagiti baboy a naapektaran ti African Swine Fever wenno ASF virus.
Inbatadna nga inaprobaran ni Gob. Matthew Marcos Manotoc a mabaloran ti tunggal maysa a naisakripisio ken naikali a baboy ti lima ribu a pisos.
Nupay kasta, kunana nga agingga laeng iti duapulo a baboy ti kaaddoan a taraken ti maysa a mannalon ti bayadan ti Gobierno Probinsial.
Mainaig iti daytoy, segun ken ni Bokal Atty. Donald Nicolas, ti Chairman ti Committee on Appropriations a nasurok-kumurang a siyam a milyon a pisos ti pundo a maiparuk-at nga ited ti Gobierno Probinsial kas tulong pinansiyal kadagiti naapektaran ti ASF.
Inpakaammona nga adda ti nasurok a pito a milyon a pisos manipod iti pundo ti Provincial Veterinary Office idinto nga adda ti 1,130,839.30 manipod iti unappropriated surplus due to recreation.
Innayonna a naaprobaran ti maikadua a pannakaibasana ti Draft Provincial Appropriations Ordinance 2019-10-083 ken dagus pay nga inaprobaran ti hunta probinsial ti maikatlo a pannakaibasana kalpasan a sinertipikaran ni Gob. Manotoc ti gakat kas urgent.
