LAOAG CITY – Inbatad ni Barangay Chairman Jogie Calapao iti Barangay Barani iti ciudad ti Batac a balligi ti paagidonar ti dara.
Daytoy ket nagbibinnuligan ti Mariano Marcos Memorial Hospital and Medical Center, City Health Office iti ciudad ti Batac, Barangay Barani ken ti Bombo Radyo Laoag kas media partner.
Segun kenni Calapao, daytoyen ti maikapat a gundaway a nangiyuswat da ti nasao a bloodletting ita a tawen.
Agpapan maisursurat ti damag ket balligi a nakaidonar dagiti 46 nga indibidual manipud kadagiti 57 a nagpa-screen wenno agkalikagom kuma nga agidonar ti dara.
Kunana nga adda met dagiti sumagmamano a saan a nakaidonar gapo iti nababa nga hemoglobin.
Mainaig iti daytoy, kuna ni Calapao a prayoridad dagiti karabangayan da a mapabuludan ti dara no kasapulan dagitoy ngem dagiti aggapoiti sabali a lugar ket mangipresentar da laeng ti letter of endorsement manipud iti kapitan da.
Maipalagip nga adda ti naputar nga ordinansa ti barangay da nga iti kada tallo a bulan ket adda ti maiyuswat a bloodletting tapno ado ti matulungan a kaprobinsyaan.
