LAOAG CITY – Inbatad ni Engr. Robert Vincent Tajora, taga Southern Leyte ken naggapo idiay Afghanistan a saan nga alisto ti nagdalanan da sakbay a nakaawid da ditoy Pilipinas idi Agosto 22 ita a tawen.
Inbaga na nga Agosto 20 idi pimmanaw da idiay Kabul, Afghanistan babaen ti panaglugan da iti Indonesial Airforce Plane a nagluganan dagiti Indonesian Diplomats.
Segun kenkuana, idi naagaw ti Taliban ti turay idiay Afghanistan idi Agosto 15 ket nagpatulong da iti Indonesian Embassy no sadinno a nagtalinaed da ditoy iti lima nga aldaw ken nairaman da iti repatriation dagiti Indonesian Diplomats babaen ti panaglugan da iti Indonesial Airforce Plane.
Nupay kasta, kuna ni Engr. Tajorda a sakbay a nakadanun da iti eropuerto ket nakaad-ado a proseso ti nagdalanan da gapu iti kaado dagiti checkpoints nga iyus-uswat dagiti Taliban.
Inpakaammo na a sakbay a rimuar da iti Indonesian Embassy ket nakikoordinar dagiti Indonesial Diplomats iti US ken NATO Forces, kasta met iti Taliban.
Kuna ni Tajorda a mismo a dagiti Taliban ti nangbayabay kadakuada iti panagturong da iti erupuerto idiay Kabul.
Innayon na a sakbay a nakadanun da iti eropuerto ket ado pay laeng a checkpoints ti nagdalanan da ken ditoy a naeksamen amin dagiti iggem da a dokumento no mapalubusan dagitoy a rumuar iti nasao a pagilyan.
Basar ken ni Tajorda, malaksid kadagiti checkpoints ti Taliban ket adda met ti isaysayangkat a checkpoints ti US ken NATO forces.
Inpalgak na a no awan ti koordinasyon iti Taliban ket saan da a mapalubusan a makalasat iti checkpoint.
Inladawan pay ni Tajorda ti ruwar ti eropuerto idiay Afghanistan nga arigna saan a madalanan ti dagom gapu iti kaado dagiti tattao a mayat a sumrek iti eropuerto iti Kabul tapno makaruar da iti nadakamat a pagilyan.
Saan met a malipatan ni Tajorda ken dagiti uppat pay a Pilipino a kakadwa na ti panangtulong kadakuada ti Indonesian Embassy tapno makaawid da a natalged ditoy Pilipinas.
