LAOAG CITY – Umabot iti lima nga indibidual ti natay idinto a dinosdosena a sabsabali dagiti nasugatan kalpasan a napabettak ti school bus iti Balochistan region idiay Pakistan.
Basar kadagiti otoridad, ti bus nga addaan ti karga nga agarop 40 nga ubbing ket napabettak kabayatan a dumaldalyasat iti ruwar ti remote town ti Khuzdar.
Kinumpirmaran dagiti otoridad a tallo manipod kadagiti natay ket ubbing.
Agpapan ita ket awan pay ti grupo a nangadmitir iti insidente, ngem ti Balochistan a maysa nariribok a probinsya iti abagatan a laud ti pagilian ket nabayagen a makapaspasar ti insurhensya ken panaglabsing iti human rights.
Mainaig iti daytoy, kinondenar ni Pakistan Interior Minister Mohsin Naqvi ti insidente nga ibilang na kas “sheer barbarism”, ken inawagan na dagiti suspek nga ayop mangpunpuntirya kadagiti ubbing tapno riribuken ti pagilian.
