LAOAG CITY – Nailatang ti 50 milyon a pisos a pundo para iti pannakapasayaat ti naawagan nga “abortion road” iti Brgy. 1, San Joaquin iti ili ti Sarrat.
Segun ken ni Engr. Robert Rabago, ti mangidadaulo iti Maintenance Team ti Department of Public Works and Highways – First Engineering District a manamnama a marugianen ti pannakatarimaan ti nasao a kalsada iti kabiitan a panawen.
Inbatadna nga addan iti implementing stage daytoy no sadino manarimaanen ti pannakaisimpa dagiti dokumento para iti naan-anay a pannakaipatungpal ti proyekto.
Nupay kasta, kunana a masapol pay ti naiget a pannakatingitingna ken mangnamnama a maaprobaran dagus ti pundo sakbay a madanon ti panawen ti panagtutudo.
Inlawlawagna a nabayagen ti nadakamat a kalsada ken mamati daytoy nga isu ti nangitunda ti alisto a pannakaperdina kangrunaanna iti pannakaaspaltona.
Naammoan a naawagan ti nasao a kalsada kas “abortion road” gapu ta arig maalisan ti maysa a masikog no dumalyasat gapu iti adu nga abut ken rikkina ti kalsada.
Immuna iti daytoy, kuna ni Mayor Remigio Medrano iti ili ti Sarrat a saanda a mabalin a makibibiang iti nasao a banag gapu ta maibilang ti nasa a kalsada kas national road.
