LAOAG CITY – Umabot iti 52 a barangay ti naapektaran ti ashfall gapu iti agtultuloy a panagngato ti aktibidad ti Bulkan Mayon basar iti Office of Civil Defense (OCD).
Basar iti report ti Philippine Institute of Volcanology and Seismology (PHIVOLCS), nagsasaruno a volcanic activity ti nangitunda ti napuskol a dapo a nangbalkot iti nagduduma a paset iti Albay.
Naammoan nga agarup alas-4:28 ti malem, naaddaan ti lava collapse iti summit ti bulkan a nag-generate ti pyroclastic density currents (PDCs) partikular iti Mi-isi Gully iti southwestern slopes.
Mapatta-patta nga immabot iti 4 a kilometro ti inparuk-at ti pyroclastic density currents a maibilang a kadakkelan manipud iti naudi a panagputok ti Mayon.
Inbatad ni Philippine Institute of Volcanology and Seismology Director Dr. Teresito Bacolcol, nagtalinaed iti Alert Level 3 ti bulkan, indikasion ti magmatic unrest ken posibilidad ti narisrisgo a panagputok.
Gapu iti daytoy, naiget nga ipawil iti panagserrek ti 6-kilometer Permanent Danger Zone (PDZ).
