LAOAG CITY – Natay iti pammaltog ti broadcast journalist a ni Adrian “Golden Boy” Loterte kalpasan a pinaltugan dagiti saan pay a nabigbig a suspek iti Daraga, Albay idi laeng kalman, Oktubre 12.
Napasamak ti nasao a pammaltog iti maysa a bakery iti Brgy. San Roque idiay Daraga, no sadinno a kellaat a pinaltupaltugan ti maysa kadagiti dua a suspek ti biktima iti oras ti 4:10 ti malem.
Gapu iti daytoy, insigida a naitaray iti Daraga Doctors Hospital ni Lorete ngem saannan a nalasatan dagiti nasagabana a sugat a nangitunda ti pannakatayna iti oras ti alas-5:00 ti malem iti nasao met laeng nga aldaw.
Kabayatanna kalpasan ti insidente, binilin ni Police Regional Office 5 ti Special Investigation Task Group para iti panangidaulona ti imbestigasion ken para ti pannakatiliw dagiti suspek iti nasao a krimen.
Iti agdama, manarimaan ti pannakaisayangkat dagiti otoridad ti imbestigasion mainaig iti insidente.
Kabayatanna, nagserbi ni Lorete kas online news anchor ti RBN News Television Rabas Cun Rabas.
