LAOAG CITY – Umaboten iti 13 ti bilang ti natay kabayatan nga umabot iti 1,529 ti pakabuklan a kaso ti dengue a nairekord iti probinsia ti Albay.
Basar iti Provincial Health Office Sanitary Engineer ken Consultant Engr. William Sabater a kaadoan kadagiti natay ket ubbing a kritikal ti kondision idi maitaray iti ospital.
Inpaganetgetna a kasapulan a paigetan ti obserbasion iti pasiente no mapukaw ti gurigorna daytoy gapu ta daytoy ti gagangay a rumrumuar dagiti komplikasion.
Inlawlawagna a kasapulan ti indigida nga agpakonsultar iti doktor no makapasar ti nangato a gurigor iti uneg ti dua agingga pito nga aldaw, panagkapsot, panagsakit iti babaen ti mata ken panagparang ti gaddil iti bagi.
Kuna pay ni Sabater nga adda posibilidadna nga agdeklerar ti State of Calamity ti Albay tapno mausar ti lokal a gobierno ti calamity fund-da para iti kasapulan a tignay dagiti barangay.
Kabayatanna, iti agdama, agtultuloy ti pannakaisayangkat ti Dengue Information Caravan ti Provincial Health Office iti nagduduma nga ili tapno isuro dagiti residente iti panangliklik ken panangkontrol iti panagwaras ti nadakamat a sakit.
