LAOAG CITY – Maysa a saan pay a masinunuo a sakit ti nakatayan ti sumurok 50 nga indibidual iti amianan a laud a paset ti Congo a kaaduan kadagiti biktima ket natay iti uneg laeng ti 48 nga oras kalpasan a nakitaanda ti sintomas, basar kadagiti doktor ken World Health Organization (WHO).
Nangrugi a nagwaras ti sakit idi Enero 21 nga addaan ti 419 a nairekord a kaso ken 53 ti pimmusay.
Basar iti World Health Organization, immuna a timmaod dagiti kaso iti ili ti Boloko kalpasan a nangan ti kurarapnit ti tallo nga ubbing a natay kalpasan ti dua nga aldaw araw nga addaan ti sintomas ti hemorrhagic fever.
Naammoan a nagwaras ti sakit idi Pebrero 9 iti ili ti Bomate.
Naipatulod dagiti sample manipud kadagiti 13 a kaso iti National Institute for Biomedical Research iti Kinshasa ngem negatibo dagiti resulta para iti Ebola ken dadduma pay a gagangay nga hemorrhagic fevers kas ti Marburg. Sumagmamano a sample ti nagpositibo iti malaria.
Nabayagen a nagballaag ti World Health Organization seknan iti panagngato ti peggad ti pannakaiyakar dagiti sakit manipud iti ayup a mapan iti tao nangruna kadagiti lugar a masansan a taraonda ket dagiti ayup iti kabanbantayan.
Ngimmato ti sumurok 60% ti nasao a klase ti sakit idiay Africa iti naglabas a dekada.
