LAOAG CITY – Inpannakkel ti Malacañang ti panangbigbig ti World Health Organization (WHO) iti Pilipinas gapu kadagiti addang ti gobierno kontra iti kinaranggas ken panangabuso kadagiti ubbing.
Nabigbig ti pagilian kas miembro ti Council of Champions to End Violence Against Children a pammaneknek kadagiti programa nga ipatpatungpal tapno lappedan ti kinaranggas a paspasaren dagiti agtutubo.
Inbatad ni Palace Press Officer Claire Castro, napateg a pangibasaran daytoy a pammigbig ti naurnos a panangipatungpal kadagiti programa ti Department of Health (DOH) a nakapokus iti proteksion ken pagsayaatan dagiti ubbing.
Iti babaen ti pammilin ni Presidente Ferdinand Marcos Jr., agtultuloy iti panangpapigsa ti gobierno dagiti pagalagadan ken serbisio kagiddan ti Sustainable Development Goal 16.2 a gagem a maisardeng dagiti amin a klase ti kinaranggaas kontra kadagiti ubbing.
Karaman kadagiti tuttutukan ti gobierno ti pananglapped iti panangabuso, pananggundaway, trafficking ken dadduma pay klase ti pisikal, mental ken seksual a kinaranggas kadagiti agtutubo.
