Nagpalagip ti Department of Health (DOH) iti publiko mainaig iti usto a panangtaripato ti bukod a bago iti kanito a makarikna kadagiti sintomas ti influenza-like illness.
Segun ken ni DOH Spokesperson Asec. Diana Lachica, ti kangrunaan a solusyon kadagiti viral infection ket ti umdas a panaginana, panaginom ti ado a danom ken panagtumar ti over-the-counter nga agas no makapasar ti gurigor a 38 degrees agpangato, uyek, panateng ken panagsaksakit ti bagi.
Inpaganetget ti ahensya a supportive treatment ken panangpapigsa ti immune system ti kasapulan tapno alisto a mapukaw ti virus iti bagi.
Nupay kasta, inbalakad ti Department of Health a no saan paylaeng nga agimbag dagiti sintomas iti baet ti panaginana ken panaginom ti ado a danom ket dagus a mapan agpakonsultar iti kaasitgan nga health center, YAKAP clinic, wenno rural health unit.
