LAOAG CITY – Naibiahe ti umuna a bansada dagiti produkto a kamatis manipud ditoy Ilocos Norte iti maysa a kompania idiay Bulacan.
Segun ken ni Engr. Maria Teresa Bacnat, Officer In Charge ti Provincial Agriculture Office, dumanon iti 6.3 a tonelada ti kadagsen daytoy.
Inlawlawagna a naiyasideg dagiti mannalon nga agmulmula ti kamatis ditoy probinsia iti nasao a kompania iti tulong ti Department of Agriculture Regional Field Office I.
Inbatadna a paset daytoy ti kinapursigido ti gobierno a mangtulong kadagiti mannalon a mangilako kadagiti produktoda iti napintas a presio.
Kunana a naiyasideg ti Sanjera Nagcarsuan Farmers Association, Inc. ken ti Zanjera Naganakan Farmers Association, Inc. iti nasao a kompania tapno agmula dagitoy iti klase ti kamatis a masapolda.
Inpasingkedna nagbalin met a napintas ti inmula dagitoy a kamatis.
Innayonna a 20 a pisos iti kada kilo ti paggatang ti nasao a kompania agingga nga adda ti mapuros a bunga dagiti nasao a kamatis.
Kabayatanna, naammoan a nausar dagiti lugan ti probinsia iti pannakaibiahe dagiti kamatis a patanor dagiti mannalon.
