LAOAG CITY – Inpasigurado ti Department of the Interior and Local Government nga awan ti special treatment dagiti innem nga opisial ti Department of Public Works and Highways – MIMAROPA a maitudtudo a karaman iti iregularidad iti ₱289.5 milyon a balor ti proyekto para iti flood control idiay Naujan, Oriental Mindoro a kinontrata ti Sunwest Inc.
Inbatad ni Department of the Interior and Local Government Sec. Jonvic Remulla, maikabil iti general prison population dagiti innem nga opisial kalpasan a nangiruar ti Sandiganbayan ti commitment order tapno ditoy nga ibalud dagiti akusado.
Agbalin a pagbaludan dagiti innem ti maysa a selda iti New Quezon City Jail, Brgy. Payatas, Payatas Rd., Quezon City.
Karaman kadagiti maibalud iti pasilidad da Engineer Dennis Abagon, dati nga OIC-Chief For Quality Assurance And Hydrology Division ken agdama nga OIC-Chief for planning and design division ti DPWH-MIMAMORA, Gerald Pacanan, Gene Ryan Alurin, Ruben Delos Santos, Dominic Gregorio ken Felisardo Sevare.
Naikabil met iti Kampo Karingal idiay Quezon City ti maysa a babai a karaman iti maanomalya a proyekto.
