LAOAG CITY – Inpaka-ammu ti militar ti Estados Unidos a dinadael da dagiti innem a military drones a maipagarup nga us-usaren dagiti rebelde a Houthi iti Red Sea.
Maibasar iti report ti United States Central Command (CENTCOM), uppat a nautical drone ken dua nga aerial drone ti nadadael iti paset ti Red Sea iti asideg ti Yemen.
Dagiti nadadael a drone ket inusar dagiti rebelde a Houthi a kanayon a mangiwaywayat kadagiti drone iti red sea kas paset ti taktikada a mangraut kadagiti commercial vessel a lumasat iti lugar.
Sakbay iti daytoy, ket impaka-ammu met ti United States Central Command a dinadaelda ti ground control station a maipagarup nga iggem dagiti Houthi idiay Yemen.
Ti presensya ti Estados Unidos iti rehion ket kas sungbat iti agsasaruno a panangraut dagiti rebelde a Houthi kadagiti barko iti lugar, agraman iti Gulf of Aden.
Kalpasan ti panangraut dagiti Houthi kadagiti barko, ket inpaima ti Estados Unidos ken United Kingdom ti proteksion dagiti lumabas a barko, agraman ti agsasaruno a panangraut dagiti rebelde.
Maipalagip a dagiti rebelde a nadakamat ket isuda pay ti nagpaputok iti missile a nangdungpar iti MV Tutor a nakatayan ti 21 a Pilipino, no sadinno a maysa ti natay.
