LAOAG CITY – Kinumpirmaran ni Governor Matthew Marcos Manotoc nga adda ti 6 a kaso ti COVID-19 variant ditoy Ilocos Norte.
Base iti impormasyon, 3 a pasyente ket manipod ditoy ciudad ti Laoag, 1 idiay Solsona, 1 idiay Paoay ken 1 idiay San Nicolas dagiti nagpositibo ti COVID-19 variant.
Naamoan a 2 a klase ti coronavirus variant ti nairekord no sadinno a 2 a kaso ti UK variant ken 4 iti South African variant.
Inlawlawag ni Dr Norman Rabago, Provincial COVID-19 Consultant, nakarekobren dagiti nadakamat a pasyente malaksid laeng ti maysa a pimmusay a taga dito ciudad ti Laoag.
Segun kenkuana, apaman a naamoanda iti resulta ti genome sample dagitoy ket dagus a nareview ti history dagiti pasyente ken naisayangkat ti contact tracing kadagiti nakapulapolda agingga iti 3rd generation contacts.
Iti agdama, 300 a contacts dagiti 6 a pasyente iti maipadalan iti test ken maisolate kangrunaan dagiti tertiary contacts. Inbatadna a saanen a kasapulan pay ti lockdown kadagiti pagtaengan dagiti close contact dagiti covid variant ngem ketdi mapan da laeng aghouse to house dagiti health experts no adda ti symptomatic wenno adda marikriknana a sintomas.
