LAOAG CITY – Nagballigi dagiti kameng ti Philippine National Police (PNP) iti inyuswat da nga illegal gambling operation iti maysa a minatayan iti Barangay Bubon, Burgos, Ilocos Norte a nakatiliwan dagiti innem nga indibidual a pakairamanan ti maysa a menor de edad.
Nabigbig ti nagminatay a ni Emma Tadena, idinto a dagiti natiliw a nagsusugal ket isuda John Kennedy Agbalog, agtawen ti 28, sounds system operator; Eugene Teodoro, agtawen ti 37, balo, mangngalap; Freddie Calario, agtawen ti 69, naasawaan; Dennis Bucao, agawen ti 39, mangngalap; Vincent Agupido, agtawen ti 44, agpapada dagitoy a residente iti nasao a barangay ken ti maysa nga agtawen ti 13 a menor de edad a taga Barangay Davila iti ili ti Pasuquin.
Nakumpiskar dagiti otoridad iti lugar ti maysa a set ti baraha, P2, 343 a cash, lamisaan ken uppat a tugaw.
Segun ken ni Police Capt. Sheryl Guzman, ti chief of police iti ili ti Burgos, naamoan da ken ni Tadena nga garop makabolanen a nakamansayag ti minatay da gapu ta adda ti iyur-uray da a kabagyan da manipod iti ballasiw taaw.
Naamoan a tallo kadagiti natiliw a nagsusugal ket benepisyaryo ti Social Amelioration Program (SAP).
Kabayatanna, naiturnover met ti natiliw a menor de edad iti Municipal Social Welfare and Development Office (MSWDO).
