LAOAG CITY – Inpakaammo ni Dr. Cheryll Didi Obra, Dean ti College of Health Sciences nga innem manipud iti Mariano Marcos State University ti topnotchers iti April 2026 Pharmacist Licensure Examination ken maibilang a No. 1 Pharmacy School iti intero a pagilian a Pilipinas iti nasao nga unibersidad nga addaan ti 90.43% passing rate.
Segun kenkuana, dagiti innem a topnotchers ket isuda:
Rank 2 – Kyla Camille Semana Ortal
Rank 3 – Hendrix Rob Bueno Cleto
Rank 7 – Gizelle Dhaye Salvatierra Damo
Rank 8 – Sofia Carranza Peralta
Rank 9 – Jelsey Miarah Melchor Velo
Rank 10 – Cyrus Strauss Vicente Opeña
Inbatad ni Dr. Obra a gapu iti napintas a resulta ti board examination ket mangnamnama daytoy nga ad-adu dagiti ag-enroll iti Bachelor of Science in Pharmacy program.
Inlawlawagna a pammaneknek daytoy a balligi a kabaelanda a makigiddan kadagiti elite schools iti National Capital Region ken dagiti dadduma pay nga State Universities and Colleges iti intero a pagilian.
Kunana a saan nga agpaudi ti Mariano Marcos State University ti panangisagana kadagiti agbalin a pharmacists iti masakbayan para iti pagilian.
Inpakaammona nga adda ti 94 board exam takers nga amin dagitoy ket first time takers no sadinno a 85 ditoy ti nakapasa ken 9 ti saan a napagasatan iti eksaminasion.
Mainaig iti daytoy, kuna ni Dr. Obra a babaen ti Technical Competency Enhancement Program ket kabayatan nga agad-adal pay laeng dagiti pharmacy students ket manarimaanen ti panag-review dagitoy para iti board examination a nakikoordinarda iti External Review Center.
Innayonna nga adda ti cash incentives a maipaay kadagiti maseknan a topnotchers kas gunguna ngem saanna pay a masinunuo no mano ti gatadna daytoy.
