LAOAG CITY – Nagbalin nga inspirasion ni Mr. Hendrix Rob Cleto a residente ti Barangay 11 ditoy siudad ti Laoag ken Rank 3 iti April 2026 Pharmacist Licensure Examination ti lolana a natay sumagmamano nga aldaw sakbay ti panag-review-na para iti board examination.
Segun kenkuana, saan a nalaka nga agpokus iti panag-review no adda ti dakkel a pannubok a sangsangoen ti sibubukel a pamilia.
Nupay kasta, inaramidna daytoy nga inspirasion tapno ad-adda pay nga igaedna ti panag-review-na tapno magun-odna ti balligi iti baet ti karit ti biagna.
Inbatadna nga adda isuna iti pagtaengan ti pimmusay a lolana kaduana ti inana idi naammoanna ti resulta ti eksaminasion.
Inlawlawagna a saanna nga inpagarup a karaman isuna kadagiti topnotchers iti board examination gapu ta admitarenna a narigat ti nasao nga eksaminasion.
Kunana nga idi ubing daytoy ket arapaapna ti agbalin a maysa a doktor, accountant ken nurse ngem iti panagtulid ti panawen ket naammirisna nga ad-adda a kalikagumna ti agbalin a pharmacist.
Inpettengna a ti maysa a pharmacist ket saan laeng a para lako ti agas no diket drug expert ken mangimpormar kadagiti pasiente no ania ti umno a wagas iti panagtumar ti maysa nga agas.
Innayonna nga iti agdama ket aginana pay laeng sakbay nga agbiruk ti trabaho.
Kabayatanna, ni Mr. Cleto ket nakagun-od ti 94.15% rating ken maysa kadagiti innem a topnotchers manipud iti Mariano Marcos State University iti kaliplippas nga April 2026 Pharmacist Licensure Examination.
