LAOAG CITY – Maladingitan ni Brgy. Chairman Reynaldo Malaqui ti Brgy. 21, San Marcos iti ili ti Sarrat kalpasan a karaman dagiti dua a Barangay Kagawadna kadagiti innem nga indibidual iti iligal a panagsusugal babaen iti panagay-ayamda ti billiards.
Segun kenkuana, ti maysa a Barangay Kagawadna ket nairaman a natiliw idinto ti maysa pay a Barangay Kagawadna ket nakalibas kadagiti otoridad.
Kunana a dagitoy ket Chairman ti Committee on Beautification ken Chairman ti Committee on Infrastructure.
Inbatadna a nakaal-alas a kitkitaen a dagiti padana nga opisial ti agsalsalungasing kadagiti maipatpatungpal a pagannurutan nga imbes a dagitoy ti agbalin a napintas nga ehemplo kadagiti kabarangayanda.
Inlawlawagna a kalikagumna a makasarita dagiti maseknan a dua a Barangay Kagawad tapno mailawlawag kenkuana ti takder dagitoy maipapan iti nasao a banag.
Mainaig iti daytoy, inpakaammo ni Kapitan Malaqui a saan met a nagkurang isuna kadagiti pammagbaga kadagiti residente a saan pay laeng nga agay-ayam ti nasao a pagbilyaran gapu ta saan pay a nalpas ti pannakaiproseso dagiti kasapulan a dokumento para iti daytoy.
Innayonna a kasangsangpetna pay laeng manipud idiay Manila isu nga itana laeng a maammoan daytoy a damag.
Kabayatanna, inpasingked ni Kapitan Malaqui nga ipasardengna pay laeng ti panagay-ayam dagiti residente iti pagbilyaran agingga a saan pay a naan-anay a maiyurnos dagiti requirements daytoy.
Iti agdama, bayat a maisursurat daytoy a damag ket ikarkarigatan ti Bombo Radyo Laoag News Team nga alaen ti komento ti maseknan nga akinkukua ti pagbilyaran.
