LAOAG CITY – Inpakaammo ni Bombo International News Correspondent Rene Ballenas manipud idiay Estados Unidos a basar iti kaudian a naiparuk-at nga impormasion ket dumanonen iti 67 ti pimmusay iti napasamak a panagdinnungpar ti eroplano ken Black Hawk helicopter.
Segun kenkuana, naannad ken naiget ti iwaywayat nga imbestigasion dagiti otoridad seknan iti insidente gapu ta gagemda nga amin a maiparuk-at a detalye ket pudno.
Inbatadna a manarimaan pay laeng ti panangimbestigar dagiti otoridad no ania ti kangrunaaan a rason iti napasamak nga insidente.
Inlawlawagna a malaksid laeng kadagiti Amerikano a nakalugan iti eroplano ket adda pay dagiti sumagmamano a Pakistani, Indian ken ti maysa a Pilipino a ti Philippine National Police Chief of Supply Management Division a ni P/Col. Pergentino Malabed Jr. nga adda iti official travel para iti pre-delivery inspection ti sumurok dua a ribu nga units ti all-purpose vests.
Innayonna a dimmanon ti 10 nga oras a nasuspenso ti flights ti rummuar ken sumrek iti Reagan National Airport.
