LAOAG CITY – Kalikagum ni Gob. Matthew Marcos Manotoc a mairubuat ti alisto a panagdur-as ti ekonomia, turismo, agrikultura, renewable energy ken dadduma pay a negosio ditoy probinsia.

Inpalgakna a maysa kadagiti nabayagen a tarigagayna a maitandudu  ti “renewable powered data center” gapu ta daytoy ket agkasapulan ti adu nga enerhia ken agsobsobra ti “renewable energy” ditoy probinsia.

Malaksid iti daytoy, kunana a pursigido a mangitandudu iti pannakaiyestablisar ti “renewable powered cold storage” a mabalin a mausar a “renewable energy” ken “cold storage” a dakkel a makatulong kadagiti mannalon kadagiti maapitda a produkto iti kataltalonan.

Inbatadna a kabulbulon daytoy ti pannakaipasdek ti “storage product processing”, “bagsakan” wenno “trading center” a dakkel a tulong iti pannakailako iti napintas a presio ti produkto dagiti mannalon ditoy probinsia.