LAOAG CITY – Inpetteng ni Gov. Matthew Marcos Manotoc, a masapol a sanguen ti responsibilidad dagiti amin a karaman ti anomalya maipanggep iti mapukpukaw a kuarta iti Ilocos Norte Electric Cooperative ditoy probinsia.
Segun iti gobernador, masapul a mangipaay ti panangilawlawag dagiti karaman iti nadakamat a banag adda man wenno awan iti kooperatiba mainaig kadagiti alegasion a pannakapukaw ti pondo iti Employee Retirement Benefit Plan Fund.
Innayonna nga aniaman a klase ti anomalya ket nasken a dagus a tamingen ti nasao a kooperatiba.
Immunan nga inpakaammo ni Acting General Manager Perry Martinez iti nadakamat nga kooperatiba a nangipatulod da ti surat kadagiti 71 nga empleado tapno mailawlawag dagiti natakuatan ti National Electrification Administration (NEA).
Mainaig iti daytoy, dagiti nakautang ket saan pay a nasingsingir ken dadduma kadagitoy ket dagiti retirado nga empleado iti nasao a kooperatiba.
Kabayatanna, agtultuloy ti imbestigasion tapno masigurado a masungbatan dagiti nairaman iti nadakamat nga anomalia.
