LAOAG CITY – Iyuswat ti Department of Health (DOH) ti measles-rubella supplemental immunization activity (MRSIA) idiay Mindanao mangrugi intono bigat, Enero 19 kalpasan ti panagngato ti kaso dagiti nasao a sakit.
Basar pay iti datos, manipod iti pakabuklan ti kaso ket 73 a porsiento ditoy ket saan a nabakunaan kontra kadagiti nasao a sakit.
Inbatad ni Department of Health Assistant Secretary Albert Domingo a ti kaso ti kamuras ken rubella ket umbot iti 5,159 manipod iti Enero 1, 2025, agingga iti Enero 3, 2026, ngimmato ti 32 percent manipod iti 3,901 cases a nairekord idi 2024.
Inlawlawag na a ti Mindanao ti iprayoridad da gapu ta isu ti nakairekordad ti kaadoan a kaso, pakairamanan iti Zamboanga Peninsula, Northern Mindanao, Soccsksargen, ken ti Bangsamoro Autonomous Region in Muslim Mindanao.
Innayon na a dagiti met lugar a nakairekordan pay ti nangato a kaso iti ruwar ti Mindanao ket iti Mimaropa ken ti National Capital Region.
Target ti measles-rubella supplemental immunization activity dagiti ubbing nga agtawen ti 6 agingga iti 59 a bolan.
Inpakaammo na a ti maikadwa a bansada ti supplemental immunization activity a maisayangkat iti Luzon ken Visayas ket naikeddeng intono Hunyo ita a tawen.
