LAOAG CITY – Madanagan ni Senador Risa Hontiveros gapu ta rimmuar a 74 a porsiento ti online traffickers a naglako ti bidyu ken ladawan dagiti menor de edad ket kabagian wenno am-ammo dagiti biktima.
Iti panagdengngeg ti Committee on Women, rimmuar iti report ti International Justice Mission Philippines a tunggal online trafficker ket addaan ti tallo nga ubbing a biktima.
Natalantan pay iti panagdengngeg nga agarup kagudua a milyon ti ubbing ti nabiktima ti online trafficking.
Malaksid iti daytoy, nagbalin a normal metten kadagiti sumagmamano a komunidad ti online exploitation dagiti ubbing gapu ta ar-aramidenda daytoy a pagbiagan.
Kiniddaw ti grupo nga agbalin a proactive ti law enforcement agencies ken Local Government Units iti pananglaban iti online trafficking dagiti ubbing.
Iti datos ti grupo, adda ti agarup 1,500 nga ubbing a biktima ti online trafficking ti naisalakan idinto nga 445 a suspek ti naarestar ken 270 kadagitoy ket nakumbiktaran kadagiti kaso.
