LAOAG CITY – Naminpinsan a nagaburan ti maysa a balay kalpasan ti panagreggaay ti bakras ti bantay iti paset ti Barangay Balaoi iti ili ti Pagudpud.
Daytoy ti inbatad ni Mr. Henrick Pedranan, ti Municipal Disaster Risk Reduction Management Officer iti ili ti Pagudpud.
Nupay kasta, inpasingked ni Pedranan nga awan ti nadangran kadagiti agnaed iti nagaburan a balay.
Malaksid iti nagaburan a balay ket adda pay ti maysa a balay a partially damaged iti napasamak a landslide iti nadakamat a lugar.
Kabayatanna, mapagnaan aminen dagiti kalsada iti ili ti Pagudpud, pakairamanan iti nagbedngan da iti Cagayan kalpasan a nawaknitanen manipod iti pannakagabur da kadagiti napasamak a landslides idi martes, Nobyembre 5.
