LAOAG CITY – Inpakaammo ni Mr. Richard Raralio, mangidadaulo ti Social Security System ditoy siudad ti Laoag nga adda ti walo a pasdek-negosio ti napanda binisita kagiddan iti pannakaiyuswat ti Run After Contribution Evaders Campaign wenno RACE.
Segun kenkuana, ita nga aldaw ket nagturongda iti uppat a pasdek-negosio ditoy siudad ti Laoag idinto nga uppat met nga establishimento iti ili ti San Nicolas.
Inbatadna a pakairamanan ditoy dagiti innem a food industry, maysa a personal services wenno laundry shop ken maysa a personal services wenno salon.
Inlawlawagna nga adda ti 36 a mangmangged ti naapektaran gapu iti saan a panangtungpal dagiti maseknan nga employers kadagiti maipakpakat a pagannurutan.
Mainaig iti daytoy, kuna ni Raralio a dagiti kangrunaan a rason ti panagbisitada ket ti saan a rehistrado dagiti nadakamat nga establishimento, saan pay a nairehistro nga empleado ken saan a panangbayad ti kontribusion dagiti agpapaay nga empleadoda.
Inpalgakna nga adda ti pakabuklan a 300,295.00 pesos ti saan pay a nabayadan dagiti employers.
Naammoan nga ita a tawen ket adda ti innem a Local Government Unit ti nabisitadan pakairamanan iti ili ti San Nicolas, Vintar, Bacarra, Solsona, iti siudad ti Batac ken ditoy siudad ti Laoag.
Kabayatanna, inpakaammo ni Atty. Jessa Reen Bonilla, Luzon North Legal Department a sipod idi bulan ti Hunio ita a tawen ket addan ti tallo nga employers ti napilaanen ti kaso ngem agtultuloy ti operasionda.
