LAOAG CITY – Inanunsio ti Iranian Army nga adda ti walo nga indibidual ti natay iti inwayat a panangatake ti militar ti Estados Unidos iti abagatan a paset ti Iran.
Basar iti rakurak ti Iran Military, karaman kadagiti pimmusay dagiti miembro ti Air Force ken Navy a maipagarup a nasugatan ken napapatay kabayatan nga ilablabanda ti pagilianda kalpasan a natamaan dagiti projectile dagiti posision iti Bandar Abbas ken Bushehr iti naiwayat a panangatake ti Amerika.
Inbatad ti Iranian Army a nangiwayat ti militar ti Estados Unidos dagiti airstrike kadagiti sumagmamano a lugar kadagiti probinsia ti Hormozgan, Bushehr ken Khuzestan.
Kagiddan ti nasao a panangatake, nangiwayat ti nagtipon a missile ken drone operation ti Islamic Revolutionary Guard Corps (IRGC) ken Iranian Army kontra iti 85 a base militar ti Estados Unidos iti Bahrain ken Kuwait.
