LAOAG CITY – Agtultuloy ti panagkiddaw ti tulong dagiti overseas Filipino workers idi Saudi Arabia a naapektaran ti COVID-19 pandemic.
Basar iti report ni Bombo International News Correspondent Kean Santiago iti nasao a lugar, naamuan na manipud kenni Gerry Lyco a saan pay a naawat dagiti distresses OFWs ti tulong pinansyal manipud iti DOLE.
Umabot iti 200 a dolyar wenno katukad ti 750 Rial ti naited kadagiti maseknan a naapektaran ti pandemiya.
Inbatad na nga agtultuloy ti panagipaay ti POLO ken OWWA gapu ti kaado dagiti OFWs nga umabot iti 800 a ribo ti bilang da.
Kabayatanna, kuna na a nagpanawagan da kadagiti OFWs a saan a dagus a mamati kadagiti managgundaway nga agikarkari iti al-alisto a pannakaiyawid da babaen iti panagbayad da ti dakkel a gatad.
Naamuan ni Santiago manipud kenni Lyco nga adda ti maysa a Pilipina nga adda ditoy pagilian ti nagchat kadagiti dua nga OFW iti Jeddah ken nagpabigbig nga adda ti asawa na nga adda iti Saudi Arabia a mabalin a makatulong kadakuada tapno makaawid da ditoy pagilian.
Gapu iti daytoy, nangipatulod dagiti dua a biktima iti 20 a ribo a pisos ken 15 a ribo a pisos.
Innayon na nga adu dagiti Pilipino a kayat na ti agawiden ditoy Pilipinas gapu ta awan ti mangtaripato kadakuada no bilang maakaran da ti coronavirus.
Umabote iti nasurok 280 a ribo ti kaso ti COVID-19 iti nasao a pagilian, agarup tallo a ribo dagiti pimmusay ken nasurok 240 a ribo dagiti nalaingan manipud iti virus.
