LAOAG CITY – Umabot ti 81 a Vehicular traffic incident (VTI) ti nairekord ditoy probinsya idi enero ita a tawen.
Daytoy ti inbatad ni Police. Lt. Col. Rafael Lero iti Police Operation and Plans Branch iti Ilocos Norte Police Provincial Office (INPPO).
Segun kenni Lero, nakairekord da met ti 37 a VTI sipud idi Pebrero 1 agingga ti Pebrero 10 ita a tawen.
Inlawlawag na iti Bombo Radyo Laoag a ti kangrunaan a makaigapu kadagiti napasamak a desgrasya ket human error, nakaro a panagpataray ken mechanical conditions dagiti us-usaren a lugan.
Kabayatanna, inbatad ni Lero nga idi laeng Pebrero 3 ket inpatungpal da ti Integrated Checkpoint Anti-Criminality (ICAC) nga inestablisar ni Governor Matthew Marcos-Manotoc.
Inbatad ni Lero nga iti nasao nga addang ket masita wenno matiliw dagiti sobra ti panagpataray na nga agiturturong ti motorsiklo.
Mangnamnama ti opisyal a babaen iti daytoy nga addang ket ad-adda pay a bumaba ti bilang dagiti madesdesgrasya ditoy probinsya.
Inpalagip ni Lero a kadagitoy a panawen ket ti desgrasya ti kangrunaan a pakatkatayan dagiti tattao.
