LAOAG CITY – Inanunsio ni Presidente Ferdinand Marcos Jr. a ti amin a 82 a probinsia iti pagilian ket addaanen ti Patient Transport Vehicles (PTVs) a mabalin nga usaren ti local government units tapno itulod dagiti pasiente iti medical facilities iti panawen ti emerhensia.
Ti tunggal lugan ket addaan ti napateg a medical equipment kas ti stretcher, spine board, wheelchair, blood pressure monitor, first aid kit ken oxygen system.
Basar iti Presidential Communications Office, addaan daytoy ti warning device ken fire extinguisher.
Maipalagip nga indauloan da Presidente Marcos Jr. ken First Lady Liza Araneta Marcos ti pannakaibunong ti 34 a nayon a Patient Transport Vehicles iti local government units iti Northern ken Central Luzon.
Naammoan a 14 ti naiyalokar para iti Region III, 6 iti Cordillera Administrative Region (CAR), 6 iti Region I ken 8 iti Region II.
