LAOAG CITY – Inpakaammo ni Mrs. Helen Rose Domingo, mangidadaulo ti Provincial Sports and Development Office a dumanonen iti 85 a porsiento ti naisaganan a billeting centers ditoy probinsia para iti mapaspasangasangan a 2025 Palarong Pambansa.
Segun kenkuana, manarimaan ti maisaysayangkat nga ocular inspection ti Provincial Engineering Office ken General Services Office tapno maipasigurado ti kinatalged amin dagitoy.
Inbatadna a manamnama nga adda pay dagiti maiyestablisar a billeting areas gapu ta manamnama a manayonan pay dagiti schools division a makipaset iti naindaklan nga aktibidad.
Inlawlawagna a basar iti obserbasionna iti napalabas a Palarong Pambansa idiay Cebu, maysa kadagiti makitana nga agbalin a karit ket ti signal connectivity tapno mai-stream dagiti aktibidad manipud kadagiti competition venues.
Kunana nga iyal-alistoda ti panagsagsagana gapu ta ti maysa kadagiti dakkel a problema pay ket manamnama a maiyuswat ti Palarong Pambansa sumagmamano nga aldaw kalpasan ti Midterm Election.
Mainaig iti daytoy, kuna ni Domingo a tapno maliklikan ti saan a napintas a resulta ket nangisayangkatda ti panagtataripnong kaduada ni Gov. Matthew Marcos Manotoc ken naibinsa-binsa dagiti trabaho ti tunggal maysa para iti al-alisto a trabaho.
Kabayatanna, naammoan a manamnama ti panagbisita ti Department of Education (DepEd) inton Setiembre 16 agingga 18 tapno maipadalan iti evaluation ti lugar.
