LAOAG CITY – Inbatad ni Dr. Ian Francis Soto nga umabot iti 86 nga atleta ken 3 nga opisyal manipod iti rehiyon dos ti nagpasar ti panagsakit ti buksit kabayatan ti Palarong Pambansa 2025.
Kuna na nga immuna a nairekord ti insidente idi Mayo 24 nga isu ti umuna nga aldaw a panaglukat ti Palarong Pambansa no sadinno a maysa nga atleta ti naitaray iti Governor Roque Ablan Sr. Memorial Hospital ditoy ciudad ti Laoag.
Segun kenkuana, kadagiti simmaruno nga aldaw ket nanayunan pay ti bilang dagiti atleta a nakarikna iti isu metlaeng a sintomas.
Inlawlawag ni Soto a saan a naggigiddan a nagpasar ti panagsakit ti buksit dagiti atleta ken tallo nga opisyal.
Inrakurak na nga idi napanda binisita ti Bacarra National Comprehensive High School nga isu iti ayan ti billeting place dagit atleta iti rehiyon 2 ket isu laeng ti pannakakumpirmar da ti pudno a bilang dagiti apektado.
Inpalgak ni Soto a nakaapektar ti sakit iti performance dagiti atleta, maysa ditoyen ti laban iti quarterfinals ti boys elementary basketball ken chess elementary no sadinno a basar iti obserbasyon da ket marigatan nga agpokus dagiti atleta da gapu iti panagsaksakit ti buksit da.
Manipod iti pakabuklan a 89 a kaso ket dua laeng ti naiconfine iti ospital ngem iti agdama ket nakaruwaren dagitoy ken nakarekobre dan manipod iti pinasar da a sakit.
Innayon na a dagiti nabatbati nga atleta ket tinutukan laengen dagiti medical officer ti Region 2 iti billeting school nga isu ti nagagasan da.
Inpakaammo ni Soto nga iti panagimbestigar da no ania ti makaigapu iti panagsakit ti buksit dagiti atleta ken tallo nga opisyal ket naduktalan babaen iti naiyuswat a water sampling a ti water dispenser ket saan a nadalos ken mabalin nga isu ti nangrugyan ti kontaminasyon.
Gapu iti daytoy, dagus a naipasardeng ti pannakausar ti dispender ken inrekomendar da laengen ti panagusar ti bottled water nga isu ti inumen dagiti maseknan.
