LAOAG CITY – Nakakumpiskar dagiti otoridad ti 9 a sachet a naglaon ti maipagarop a shabu manipod iti subject ti drug buy-bust operation iti paset ti Sitio Liwliwa, Barangay Crispina iti ili ti Banna.
Nabigbig ti subject ti operasyon a ni Mr. Magdaleno Guiang alyas Macky, agtawen ti 32, naasawaan, taga Barangay Tabug iti ciudad ti Batac ngem agdama nga agnanaed iti Sitio Liwliwa, Barangay Crispina iti ili ti Banna.
Naamoan a ti maysa a sachet a naglaon ti maipagarop a shabu ket maipagarop nga inlako ti suspek iti nagpammarang a poseur-buyer idinto a ti walo a sachet ket nakumpiskar dagiti otoridad iti panangkapkap da kenkuana karaman ti sangaribo a pisos a nausar kas buy-bust money.
Inbatad ni Police Major Chris Anthony Sorsano, ti chief of police iti ili ti Banna nga addan ti sumagmamano a lawas a plinano da ti insayangkat da nga operasyon kontra iti suspek.
Inpakaammo ni Sorsano a malaksid iti ili ti Banna ket adda pay ti impormasyon da nga agop-operar iti ili ti Paoay, Nueva Era ken iti ciudad ti Batac ti nasao a suspek.
Nupay kasta, nagkedked paylaeng ni Sorsano a nangipublikar dagiti dadduma nga impormasyon da, kangrunaan na ti possible a supplier ni Guiang.
Mainaig iti daytoy, inpakaammo ni Sorsano a ti nakumpiskar da a maipagarop nga illegal a droga manipod ken ni Guiang ket agdagsen ti dua a gramo ken agbalor ti 13,600 a pisos.
Ti suspek ket adda iti target watchlist ti Philippine Drug Enforcement Unit (PDEA) ditoy probinsya.
Nagballaag met ni Sorsano kadagiti mamonmonitor da pay nga addaan ti illegal nga aktibidad nga isardeng dan daytoy gapu ta amangan no dagitoyen ti sumaruno a matiliw da kadagiti sumaruno nga operasyun da.
Kabayatanna, iti interview ti Bombo Radyo Laoag iti subject ti operasyon, inpetteng na a saan nga aglaklako ti illegal a droga ngem inadmitir na nga agus-usar daytoy.
Kuna na pay a no agusar ti illegal a droga ket mapan iti taltalon tapno saan a makita ti asawa ken anak na.
Immunan a kinumpirmaran ti asawa ti suspek nga itugtugot ida ni Guiang no adda dagiti pagturturungan na kadwa da ti anak da nga agtawen laeng ti maysa, ngem saanna nga ammo nga illegal a droga ti transaksyon daytoy.
Inpalgak pay ti asawa ti suspek a no tinggaren na a saan nga agusar ti illegal a droga ket pagsasawan na daytoy.
Iti agdama, ti nasao a suspek ket nagtalinaed iti kustodyar ti Philippine National Police iti ili ti Banna ken sumango iti kaso nga illegal a panagikot ken panaglako iti illegal a droga.
