LAOAG CITY – Kinumpirmaran dagiti otoridad a siyam a tattao ti natay kalpasan a dinarusdos ti maysa nga SUV ti ayan dagiti naruay a tattao iti kabayatan ti selebrasyon ti Lapu Lapu Festival idiay Vancouver, Canada.
Basar kadagiti otoridad, malaksid kadagiti natay ket nasurok a 20 a sabsabali dagiti nasugatan iti insidente.
Inbatad pay dagiti otoridad a ti driver ti SUV ket agtawen ti 30 a lalaki, residente metlaeng iti ciudad ken addan iti kustodyar da.
Kumpiyansa dagiti otoridad a saan nga “act of terrorism’ ti nasao nga insidente.
Naamoan a ti suspek ket am-ammo unay dagiti pulis ngem saan da paylaeng a makaipaay ti komento no daytoy ket addaan ti criminal background.
Ti Lapu Lapu Day ket maysa kadagiti kadakkelan a maselselebraran iti Pilipinas ken opisyal a binigbig ti British Columbia, adda dua a tawen ti napalabas.
Kabayatanna, inpeksa ni Canadian Prime Minister Mark Carney ti nakaro a pannakakigtot ken panagbalin na nga “heartbroken” gapu iti nakaam-ames nga insidente, kagiddan ti panangidanun na ti pannakipagladingit na iti pamilya dagiti pimmusay.
Iti baet ti napasamak, saan a patien ti prime minister nga adda ti aktibo a pangta iti biag para kadagiti Canadians.
