LAOAG CITY – Kinumpirmaran ni Dr. Loida Natividad, ti Medical Officer III ti Schools Division Office of Ilocos Norte nga addan 91 a porsiento ti nabakunaanen kontra iti covid-19 a teaching ken non-teaching personnel ti DepEd Ilocos Norte.
Segun kenkuana, umabot iti 4,368 dagiti empleado a nabakunaanen no sadino 3,318 wenno 69 a porsiento ti fully vaccinated ken 22 a porsiento ti agur-uray para iti maikadua a dose ken siyam a porsiento met dagiti saan pay a nabakunaan gapu ta maiyur-uray pay laeng ti iskedyul dagitoy.
Inbatad na a daytoy ket kas paset ti nairubuat a Vacc2School: Ligtas na Bakuna, Para sa Balik-Eskwlela! Campaign para iti nasaysayaat ken nataltalged a panagadal dagiti agad-adal ken panangisuro dagiti mangisursuro.
Kabayatanna, inlawlawag ni Dr. Natividad a dagiti ubbing nga estudyante nga addaan ti comorbidities ti maipangpangruna.
